Yoroyoro

Yoroyoro nyɛla bindirigu shɛli dagbamba ni bali shɛŋa ban be tuduu yaɣili ŋɔ tooi zoogi ka bi dira.

Kariwana shɛli dini fɛbi ka bi mali duɣirili.

Yoroyoro ni sima kpam, bee kpakahili shɛli bini nyɛligi, nti pahi alibalisa din chɛri ni naanzuzim,ka bi dira.

Di anfaani

1. Di nyɛla ti ni diri shɛli kariti kum.
2. Di nyɛla bindirigu din kpaŋsiri yaa ninsali koba ni.
3. Daabihi ban duɣiri li kohiri nyɛri liɣiri di kohibu ni.
4. Pukpariba ban kohiri kariwana tiri yoroyoro kohiriba gba nyɛri liɣiri.

Duɣili nɛma

Yoroyoro duɣili nɛma n-nyɛ

1. Kariwana
2. Nanzuzim
3. Kom
4. Alibalisa
5. Kpakahili / sima kpam
6. Yalim
7. Duɣu

Duɣili Soya

Yoroyoro duɣili soya n-nyɛ

1. Poi ka ayi duɣi yoroyoro a yɛn fɛbila kariwana maneeka ni ka pobisi yihi di difu maa.
2. A ni mali buɣum, ka toogi kom niŋ duɣu ni tam, ka kpaagi kariwana maa niŋ diyi ti kpeera.
3. A ni chɛli tam buɣum maa zuɣu, ka niŋ yalim bahi dini kariwana maa yiti saɣi bibu.
4. Di yi niŋ ka kom maa yi naagi ka kariwana maa na bi bi, a ni toogi kom pahi ka ti suuli a nini yiti tiɣi di bibu.
5. A yi pani bo duɣu n tam buɣum zuɣu, ka kpaagi sima kpam bee ka a ŋmaagi kpakahili niŋ. Alibalisa maa yi moogi, ka a suugi kpam maa buɣum zuɣu.
6. A ni to naanzua ka niŋ yalim zim bɛla gabi di ni.
7. Pumpoŋɔ a ni bo ŋmani toogi yoroyoro maa niŋ, ka toogi naanzuzim yuɣisi, ka naan yi toogi kpakahili mini alibalisa maa pahi.