Salima:Bia Yuli Tibu Musulinsi Adiini Ni

Di daa nyɛla Asibiri dali asiba ka Azindoo yɛli ni o ni zaŋ o binkɔbiri ŋɔ yi ka bɛ ti ŋubi mɔri. Azima daa doli o yi ka bɛ chaŋ. Azindoo daa taɣila bɛ binkɔbiri maa n-ti ze yili shɛli gulinyaanga ka bɛ ŋubiri mɔri. Ka bɛ nya ka niriba kuli kanna yili maa. Ka bɛ nya ka paɣiba duɣiri bindira, ka Azima bɔhi Azindoo, “Bɔ m be yili ŋɔ ni”? Ka bɛ daa nya bɛ zo Napari ni be yili maa sambani ni ka bɛ bɔhi o ka o yɛli ni, o ba Afa Alhassan m-mali suuna. Ka Azindoo bɔhi o, “wula ka Musulinima niŋdi suuna”? Ka Napari daa piligi n-yɛri ba.

“Musulinsi adiini puuni, paɣa yi dɔɣi bia bɛ moonila jiŋli n-niŋ o nudirigu tibili ni ka yiɣisi n-niŋ o nuzaa tibili ni. Musulim’ paɣa yi dɔɣi bilɛɣu, o ba bɔrila bindiri’ shɛŋa din yɛn che ka bihim niŋ ka bia mɔɣi. Musulinsi adiini ni, paɣa yi dɔɣi di naba dali ka bɛ pindi bia maa zuɤu ka yihi o yuli polo (suuna). Dindali maa, bia ba ni bɔ piɛɣu ka bɛ kɔrigi n-duɣi ka salo di. Musulimnima mali anabaawanima yuya bee Naawuni yuya din nyɛ kɔbigu yini ka m-booni bɛ bihi yuya. Yuli maa yi boli naai bɛ duɣirila bindira ka bɛ daŋ mini zosimnima zaa laɣim n-wuhi suhipiɛlli. Musulimnima ni tiri bia yuli shɛm m-bala”. Azindoo puhi Napari; “Ni ti zuɣu suŋ”. Bɛ ni ŋmaligi n-labiri bɛ binkɔbiri maa sani ka bɛ yɛli ni bɛ yi pa baŋ Musulinima mini Kayanima ni niŋdi bɛ suunanima shɛm. Bɛ baŋ di waliginsim ni nyɛ shɛm.

Bachi biɛlima

Karimi salinli shɛli din be zuɣusaa ŋɔ ka booi di bachi gahinda gbuna ni. Lɛbigim lala bachi gahinda ŋɔ silimiinsili ni n niŋ a kundi sabirili puuni.

Bɔhisi

Labisim bɔhisi ꬼɔ viɛnyɛliꬼga 1. Bɔ ka Azindoo mini Azima daa lee niŋda ka nya niriba ni laɣimzia?

Tuma

1. Wuhimi musulimnima yuya dibaanahi: paɣaba mini dabba zaa. 2. Wuhimi waliginsim dibaayi shɛli din be kayanima mini musulimnima suuna ni. 3. Wuhimi yɛla ayi shɛli din ŋmani taba musulimnima mini kayanima suuna ni.