Saɣisigu: Baŋmi bɛbu

E-Class

M mabia, zomi dabiɛm

Che ka sala biɛhigu wuhi a yɛm

Teemi ni bia yi ʒinimi pɔi ka ti naan yi gbam ka chaŋ.

Ka ti kurigi dihi jaangbee pɔi ka naan yi labi ʒini yiŋa.

Amaa nyɛvulilana yɛla m-bala

Nina bela tooni

N-nyari din kanna

Pa din garita.

Bi tuɣirila gbarigu ni o nya din garita ka din kanna.

M mabia, lihimi a tooni,

Ka Che a nyaaŋa mini a luɣa ni lihibu.

Sɔhila gariya ni di yɛlimuɣisira

Tammi di yɛla.

Zuŋɔ paana ni di yɛlimuɣisira Nyaŋmi li.

Biɛɣuni be soli ni di yɛla

Lomi shɛlɔra gu li.

Sɔhila nyɛla zuŋɔ saɣiri

Ka di milinsi yɛn sɔŋ ti ka ti nyaŋ zuŋɔ.

Zuŋɔ nyɛla lahibal' palli

Din pili ka na bi naai.

Ka biɛɣuni mi nyɛ bɔhigu.

M mabia, yimi a biɛr' kurili ni

Ka deei zuŋɔ dabsili ŋɔ fukumsi n-su

Ka gu ka taɣi biɛɣuni.

Gamo yi niŋ

Yɛla ata m-beni.

Yɛl' yini buɣisiri daadam

Ka shɛli saɣindi daadam

Ka dini la mi kpaŋsiri daadam.

A ni daa nyɛ bia,

Pɛnsili ka a daa mali sabira.

Amaa zuŋɔ pɛn ka a sabira

Dama bilim ni chiriŋ kpihinda

Ninkurilim ni chiriŋ bi kpihinda.

Teemi ni sala ku be o ko

Ninvuɣ' yino mi ku nyɛ zuliya

Deemi biɛla niŋ a nangban' biɛɣu ni mi pala turi.

Takahizabira kam daa di takahi.

M mabia, m bɔri yuɣu bi pihiri yuɣu

Shɛhiragbana bi diri fali.

Pololi du tia

O chomda n-kani.

Malimi so

Ka so sa mali a.

Diribarilim yi di kani

Sokam puli naan pali.

A ko maa,

Ka di pahi a bɔ?