Yuŋlana

Binkukuri kuriya,

Ka kɔriŋga deei yu’ biɛɣu

Gbaŋkɔɣu kuya,

Kpaɣa vooya,

Narili toya.

Ka bɛ bɛiri n gindi yuŋlana.

Ŋubiri waayo ka ʒim ku yi.

Kuri yiŋa ku n-ku mɔɣu ni.

Yiɣiri fiiyo ka kpumkpama kani

Sɔnya bia kumdi wari,

Ka buɣum diri o ma pulini zibzib.

Ŋmariliɣa, bumbɔni niŋya,

Ka sobuɣum lɛbi jina daaŋkpali.

Neeri waayo ku n-nyooi dilana.

Nyaribara kumdi wari,

Ka yuvolilana wum lara,

Ni bɛ yɛri pakurigu sɔɣu yɛla,

Ka o yɛra ni saa ku gbunni.

Kuri yiŋa ku n-ku mɔɣu ni lana.

Sibilaa be mɔɣu ni,

Ŋɔŋshilaa be mɔɣu ni,

Soonlɔɣu be mɔɣu ni,

Sɔnya kɔŋ kura ka kuri yiŋa.

Diri dari yuŋ ku di wuntaŋa ni.

Wuntaŋa luya,

Ŋmariliɣa bumbɔni niŋya

Ka sɔnya diri dari n-neeri liilii

N-zaŋ nubihi n-lɛbi murijiŋ buɣum

N-neera ka doli li.

Neeri waayo ku n nyooi.

Kabisi do punu luɣili kumdi wari,

Ka yuŋ paai

Ka o lɛbi naɣinyili n-vari giriligirili.

N-yiɣiri palimampalim,

Ka kpuŋkpama kani,

M-pa saazuɣu ka tɔrili la.

N-laani ka wubiga la.

M-be tiŋa zaŋ naba lɛbi warinaba,

N-chɛri ka di chibiri chibichibi.

Ka zaŋ nina n-lɛbi wuntaŋa,

N-za luɣ’ yini n-yuuni luɣili kam.

Pakurigu ʒiɛduɣibila viɛhimi ka mira.

Pakurigu noli ku n-chihi yim naɣila buɣili ni

Kuri yiŋa ku n-ku mɔɣu ni.

Ŋmari zuɣuri waayo ku n-ŋma waɣizuɣu.

Di yi pa nyini,

Ŋuni n-na mi n-ku valiga ka ʒim ku yi,

N-yiɣiri ka kpumkpama kani,

N-ʒe luɣ’ yini n-yuuni luɣili kam.

Ŋubiri waayo ka ʒim ku yi lana,

Ŋmari zuɣuri waayo ku n-ŋma waɣizuɣu.

Kuri yiŋa ku n-ku mɔɣu ni dabuɣulana.