Suuna
Suuna nyɛla saha shɛli bini piiri yuli tiri bini na yɔli dɔɣi bia so. So shɛŋa bini doli tiri bihi maa yuya maa doli la bɛ kali ni bɛ Adiini. So' shɛli bini doli tiri bihi maa yuya maa ni too n-nyɛ dabisa, goli bee Yuma.
Dagbamba kali soli zuɣu bia yuli tibu ka bɛ zaŋ bɔli zuɣu pinibu . Zuŋɔ Musulinsi adiini che ka ti booni li suuna.
Paɣa yi dɔɣi, o dɔɣibu maa naba dali ka ti booni suuna bee zuɣu pinibu. Bɛ yi nabi pini bia maa zuɣu bɛ booni o la saandoo bee saampaɣa o yi nyɛla doo bee paɣa. Daŋ' kpamba nyɛla ban yɛn go viɛnyɛla. Bɛ ni vihi m-bɔhi nya bia maa ni siɣi so daŋ maa puuni bee o gba kuli kamina o maŋ zuɣu. Paɣ' dɔɣiso yiŋnima gba ni tahi ʒiɛri na n-ti sɔŋ o yidaan'yilinima. Doo maa tizo paɣa ŋun daa pirigi o paɣa maa gba nyɛla ŋun kahiri ʒiɛri n-guri zuɣu pinibu dali.
Dindali maa biɛɣu yi neei, suhupiɛlli dabisili m-bala. Baɣa yuli kam din beni bɛ ni mali ka zaŋ bia maa yina n-ti pini o zabi biɛri maa bahi, o yi nyɛla doo bɛ ni guni o.
Dagbamba kali soli zuɣu, doo maa yi mali yiko o ni kɔrigi piɛɣu bee bua n ti pahi baɣa yuli nɔhi la zuŋɔ.
Bɛ ni moni saɣim n-tari bɛ ʒi ʒiini taba ni saamba ban kana zuɣu pinibu bee suuna maani.