Salima:Sɔtali nyɔri

Diyila Dagbani Wikipedia

Sɔtali Nyɔri Do' so mini o paɣa n-daa beni, Naawuni daa larigi ba la bi' yino bɛ biɛhigu puuni. Fara mini o daŋ zaa daa kahila bɛ ŋmana n-kuna doo ŋɔ mini o paɣa maa sani ka bɛ ti beni. Bɛ bia ŋɔ ni daa ti paai yuun' pia ni anu, o daa suhu o laamba ŋɔ ni bɛ niŋmi o yɛda ka o yi sambanni ti bona ka bɛ gba ti yihi dunia takahi shɛli din ʒi bɛ zuɣu maa. Bɛ daa ti bia ŋɔ soli ni o yi n-ti nya Naawuni ni yɛn tum o nam tuma shɛm. Doo ŋɔ mini o paɣa daa kɔhila bɛ binshɛɣu kam n-zaŋ di liɣiri maa ti bia maa ka o niŋ chaagi go lala gɔrim maa. Bia ŋɔ ni daa paai o bɔmma ŋɔ shee, o daa niŋ yomyom m-bɔ tuma ka che ka o mini ban tumdi maa baŋ ni takahi yihibu zuɣu ka o kana maa. O daa nyɛla ŋun tiri jilima pam bɛ tuma maa shee ka lahi ka ninchini. Di yuun' pishi nyaaŋa, bia ŋɔ daa nyɛla arizichi ni kpe so pam ka o maŋmaŋ ti baŋ ni pumpɔŋɔ o yi pa labi yiŋa o ni tooi yihi takahi ti o laamba maa. O daa chɛbisi o mini ban daa tumdi maa mini bɛ kpamba zaa ni o yi pa ni kuli yihi dunia takahi ti o laamba dama o yi pa nya liɣiri viɛnyɛla. Bia ŋɔ daa niŋla nachimbila kurili zaa ka o laamba ŋɔ gba niŋ ninkura. Bia ŋɔ ni daa paai o ya maa ni na, di daa niŋla yuŋ saha shɛla ka di che ka o bi tooi lahi baŋ o yiŋ' soli. O ma yilikpɛrilana ka o daa baŋ o yiŋa n-daa chaŋ ti neegi o ka o zaŋ o chaŋ bɛ yiŋa nti kpahi o ma dunoli ni o yiɣisi deei san' ŋɔ. Bia ŋɔ ma daa deei o nɛma zaŋ kpɛhila saamba duu ka o yilikpɛrilana ŋun ŋmaligi kuli dama di daa nyɛla yuŋ saha shɛli. O ni daa zaŋ o bia ŋɔ baaji ŋɔ kpɛhi ni o ti zaŋ zali, o daa yooi lala baaji maa yuli di puuni ka liɣiri n-kuli pali lala baaji maa. Paɣa ŋɔ mi daa bi baŋ ni o bidɔɣiro la mi m-bala, o yilikpɛrilana mi gba daa bi yɛli o ni o bia la m-bala. O daa bi yɛli shɛli ka chaŋ o yidana sani nti yɛli o, "Oooo! Nyama ti nyala sana, saan'so ti mi ni nya maa, o liɣiri ŋmanila kom di zuɣu a yi di saɣi ka ti ku o ti gba naan ku di dunia nyaɣisim ŋɔ? O liɣiri maa ka naabu dali di zuɣu ti kumi o ka di li". Doo ŋɔ daa bi saɣi ti o paɣa ŋɔ yɛltɔɣa ŋɔ ka yɛli o ni, " A ka alaafee yɔɣɔ? Baŋmi ni sana m-bala, a bi mi o ni nyɛ saan' so ka lahi mi ni a gba bia be shɛli polo n-gba be shɛba nuuni. Baŋmi ni lala san' ŋɔ maa yi kpi, bɛ ni zilisi ti yaŋɔ bee o yi sa nyɛ a maŋmaŋ dini wula ka a yɛn niŋ?". Doo ŋɔ ni daa yɛli o paɣa ŋɔ lala, o daa jela suli ŋmaligi kpe o duu n-ti kahiri o nɛma ni o zo. Doo ŋɔ daa nya o ni kahiri o nɛma ka ŋumdi yɛri o kparima ni, ka o daa yɛli o ni o kpemi ti tum o tuma. Paɣa ŋɔ daa shiri ŋmaligi kpe sana maa sani n-ti ŋmahim ku o ka kpuɣi o liɣiri maa yina Biɛɣu ni daa neei, paɣa ŋɔ yilikpɛrilana daa kuli yila o yiŋ' zɔrina ka maani o chinchina sɔra. O daa paai yili maa ni ka o zo ti koonila o dundɔŋ ka o puhi o ni, "Ooi n zo ni ti zuɣusuŋ, ni ti zuɣusuŋ". Di daa garila o zo dama o bi mi zuɣusuŋ shɛli yɛla ka o zo ti puhiri o lala ka o bɔhi o, "Wula bo zuɣusuŋ ka a ti puhiri ma lala, a yidana m-bo paɣa pahi a zuɣu yɔɣɔ?". Di daa garila paɣa ŋɔ gba o yilikpɛrilana ni labisi o shɛm maa ka o yɛli o, "Ooi a bia yi shiri kuli chaŋ bɔmma kuna zuɣusuŋ bɔ n-lahi paai li?". Paɣa ŋɔ ni daa baŋ ni o bia maa ka o sa ŋmahim ku maa, o daa kuhimi hali ka o nintam zaɣisi ŋmaabu. Ka o daa lee zaŋ saɣisigu ti o paɣ' taba ni bɛ miri ka bɛ ti nya sana, ka tɛhi o zaɣ' biɛɣu dama o yi sa pa a dini, o lee ni nyɛ a zo dini.