Salima:Kunduŋ mini Piɛbila

Kunduŋ mini Piɛbila: Dahinshɛli ka piɛri daa yi ni bɛ ti ŋubi mɔmaha ka piɛbila so daa yɛli ni ŋun yɛn yulimi ʒiɛm o ma mɔŋubirigu. Piɛri ŋɔ ni daa paai mɔɣu ŋɔ ni, piɛbila ŋɔ daa ŋmaligimi ka che o manima n-kpa o kpabu.🐑 Piɛbila daa kuli ŋubila mɔri ŋɔ hali n-ti yirigi dama o daa baŋya ni o ni pa paai shɛli maa o yi bi labi o nyaaŋa toya ni ti kum gari Aliru.🌚 Piɛbila ŋɔ mi daa chani maa ka Kunduŋ gba puɣisiri o mi ka o bi mi. Saha shɛli piɛbila ŋɔ ni daa ti yɛn ŋmaligi labi o manima ŋɔ sani, o lihi o nyaaŋa ka Kunduŋ lihiri o la kum lihigu. Piɛbila ŋɔ ni daa je ni o gbaŋ chɛhi la zuɣu, o daa kuli maala o maŋa n-lihiri Kunduŋ ninni n-ti bɔhi o, "A yɛn ŋubi ma mi yɔɣɔ?" Kunduŋ gba daa labisi o ni, "Iiii! Ni chɛhi a gbaŋ zuŋɔ, so mi n-kani yɛn faagi a bahi". Piɛbila daa yɛli Kunduŋ ni, "Pahimi suɣulo ka guhi saha biɛla dama n ŋubila mɔri pam di mi na bi nɛm m pulini di zuɣu a yi ŋubi ma di yɛn ŋmanila mɔri ka a ŋubi dama m pulini mɔri maa ni saɣim dimdi maa". Kunduŋ daa saɣi Piɛbila maa zaligu maa ka yɛli o, "Tɔ n wumya, hali di yi yɛn niŋla saha gbaliŋ gba, n ni guli a". Piɛbila ŋɔ suhu daa paligiya pam Kunduŋ ni saɣi ka ti o saha maa ka daa puhi o ka paɣi o. Minti pia nyaaŋa ka Kunduŋ yi pa yiɣisi m-mirigi o nina n-niŋ shili ni o pa gbaai Piɛbila ka o lahi taɣi o zali ka yɛli o, "N zo Kunduŋ pahimi suɣulo ka pahi ma saha biɛla dama mɔri maa na bi nɛm naai. A yi ŋubi ma saha ŋɔ mɔri noli n-na yɛn nyɛ n nimdi di zuɣu che ka n wa waa ka mɔri maa nɛm yomyom ka a naan yi ŋubi ma". Kunduŋ daa lahi saɣi Piɛbila ŋɔ yɛligu ŋɔ che ka o pili waa ŋɔ wabu. Piɛbila ŋɔ daa kuli warila waa ŋɔ yinyahili wabu dama di daa ka gbunni n-ti fɔhi zani yim. O zanibu ŋɔ daa garila Kunduŋ ka o fɔ n-ʒiya lihiri o. Piɛbila ŋɔ ni daa zani saha shɛli ŋɔ o daa yɛli Kunduŋ ni, "N ku tooi wa waa maa viɛnyɛla dama binkumda bi kumda. A nya kunkɔŋ shɛli din be n nyiŋgoli ŋɔ ni maa, yihimi lala kunkɔŋ maa n-ŋmɛri li pampam niŋdi ma ka n wara. N yi wari pampam di ni che ka mɔri maa nɛm yomyom". Kunduŋ suhu daa pa yiɣisimi ka o kabi chaŋ Piɛbila ŋɔ sani n-ti darigi yihi kunkɔŋ shɛli din be Piɛbila maa nyiŋgoli ni maa m-pili li ŋmebu. Kunduŋ daa kuli yihila o yaa zaa ŋmɛri lala kunkɔŋ ŋɔ ni Piɛbila wa yomyom ka o gbaai ŋubi ashee laasabulana bua, bubil'kpibiga. O daa ŋmɛri li maa ka piɛgula bɔrila o Piɛbila ŋɔ shee n-ti wum kunkɔŋ ŋɔ ni ŋmɛri pampam ka o kana ka Kunduŋ nya o ka guui ka Piɛbila daa tiligi.