Ŋuni n-lee nyɛ ma?

Sasabira maa yuli n booni Kukuo Naa Emmanuel Issifu.

Ŋuni n-lee nyɛ ma?

Mani n-nyɛ nadabili

Niriba yi be duu,

Mani baɣila dunoli ni.

Kpɛŋlana Naa yiko ni ka n yi kpe duu,

Garo lɔŋni leei n dooshee.

Ŋuni n-lee nyɛ ma?

Mani n-nyɛ ŋun bukaata ka zaŋ buɣisi

Ka n chɔɣinsi mi lahi ka kpee.

Nira kam yi bi nya ma,

O ku tooi chaŋ bahi o maŋa.

Bɛ mi yi lahi nya ma,

Ka bɛ nɔri ma ka vuri ma.

Bɛ so bi zɔri ma nambɔɣu.

Ŋuni n-lee nyɛ ma?

Bɛ yi yɛli ni dari,

Mani n-nyɛ dari.                                                                                                                     

Bɛ yi yɛli ni dimaŋa,

Mani n-nyɛ dimaŋa.

A yi bɔbi ka che nyee sa.

Ka m bi do a tiŋli,

A dimaŋa be yoli

Ŋuni n-lee nyɛ ma?

Chuɣu dali yi paai ka m bi yi polo,

Chuɣu ni puhi chuɣ’ chɛrachɛra.

Amiliya yi lo ka bɛ bi nya ma di ni,

Amiliya ni niŋ zaŋ’ gbuluŋ.

Dama,amiliya ku tooi yina.

Ooi! Ŋuni n-lee nyɛ ma?

Mani n-nyɛ jilima ku pali nuu,

Ka bukaata pali piɛɣu.

N nama dali ka n kɔŋ zuɣu

Bɛ daa dɔɣi ma la naa.

Ka lahi ŋmaligi da ma.

Ka n lee nadabili.

Ka bɛ zaŋ ma boli namda

Tɔ! ŋuni n-lee nyɛ ma?