Ŋuni N - LEE NYƐ MA?

ŊUNI N- LEE NYƐ MA?

Mani n- nyɛ sal'binamdili

Ŋun kuri o suhu ka lahi n chirisiri li

Ŋun kpehiri o yɔɣu ka lahi yihiri o polo

N kalinsi n lahi diri daadam nyɛvuli yom yom

Ka lahi n tahiri fitina ni yolim yolim balibu kam na tiŋa puuni

N bukaata ka zaŋ buɣisi

N barina mii gba lahi ka kpee

Ŋuni n- lee nyɛ ma?

Daadam n wumsi ma ka n- yiɣisi na

N- ti su o mini o kama zaa

Mani n- nyɛ bɛ ni bi bori so n- tiɣira

Shɛba bori ma asiba wuntaŋ palli

Ka shɛba mii bori ma wuntaŋ ʒili

Shɛba bori ma nudirigu polo

Ka shɛba bori nuzaa polo

Ŋuni n- lee nyɛ ma?

Mani n kpaŋsiri daŋ sim'tali

N malindi bɛhigu ka lahi

N kpansiri paɣa mini doo yuriliem ni ashiya

Mani n- su daadam yɛli ka di zani ʒi'puuni

N vuubu biɛla n kpehiri dimili mini jɛlinsi sim'nima ni dɔɣiriba sunsooni

Oo! Ŋuni n-lee nyɛ ma?

Mani n kuuri shɛba suhuri

N nymaari shɛba nintam

Ka yoori alaafeei soya n- tiri shɛba

Ka lahi wuhiri daadam dariza

Ŋun ti mali ma yubu n- niŋda

Ŋun mii kɔŋ ma nintam gari ko'garawa

So mii n- naʒin n bo ma n- ti tiɣi

Ka bɛ zaŋ ma boli laɣifu

Tɔ! Ŋuni n- lee nyɛ ma?