Salima:Piɛli vua
Piɛli vua[mali mi di yibu sheena n-niŋ]
Di labi nyahigi mini o paɣ'bia di ŋme n-ziŋ. Ku chaŋ mɔɣuni ka gam n-kuli paɣ'bia. N tab' zɔri n-bɔri valiga ka valig' zɔri n-bɔri n-shee. N tab' kuni ni kol'kuma Ka n ʒiri ka tuɣiri ka nyaɣiri ka buɣiri ka danda. Jaanbɔna du saazuɣu ka n dini n-mi dede. Mani n ka mɔɣuni ka valisi gɔhi tɔra n-lɛbi bɛ shee. Mani n-vulim vulinga ka valisi wum n-zɔrina ni jiri. Mmmhhnnn! Chichigu! Barinbaa! Biɛɣu yaa neeya. Gungɔŋ dahim ya. Ka n bɔri ni m birigi mɔɣu polo n-ti bɔhi n zuɣusuŋ. Yiɣisi n-zani n nyaaŋa. Ka n-chaŋ tum n Nam tuma. N bɔri ni tigbura, karima, kunkuna n-tabli naɣilima lɛbila gumdi Ka n-samdi ka viiri n-yira. N bɔri ni valig' kam wum n-ʒiɛɣu Ka zɔri n-kanna ni dari. N bɔri ni valigi kam yuli chirigi n-ninni Ka lu n-tooni abirima. N bɔri ni n-ti yɛn labi n jaanbɔŋ, ka valig' pun do yepiɛlga pansain n-tabra. N bɔri ni n-kpuɣila n zuɣu n-yuli tooni ni nyaaŋa, nudirigu ni nuzaa Ka valig' kam ŋunibu shee pihi pani polo. Tummi a nam tuma. Ka bɛ ti niŋdi n-bo ka n deeigi n-faa n-zaŋ ti a. Ka bɛ ti yɛri n kpaŋ-maŋa, ka n deeigi n zaŋ ti a. Ka bɛ ti kalindi dabba, Ka n yuli n-be tooni. A gu'ʒɛɣu n-bɔŋɔ ka n tira. Deeimi ka che ka n kpe nimmɔhi ŋɔ puuni n-pli yi. Nasara yi kana, N nyɛla ŋun yɛn ti a gupiɛlli. N-wuhi n suhupiɛlli. Shenbila! Bolimi Di Malo Che ŋuni, ka kpuɣi kogaɣili ni jaanbɔna maa ka ti gbaai soli. Yambu! Tammi duɣu yaa...ti kunna. Heeecha! Zuŋɔ doo yaan tum tuma.