Salima:Bia mini o ma

Zuŋɔ salinli, bia mini o ma n-daa diri alizama ka n zani wum bɛ alizama maa ka di niŋ ma yoli pam. Bɛ alizama maa ni, bia maa ma daa bɔhi o

Ma: M bia n ni daa kpuɣi a puli hali ni n ti yɛn dɔɣi a, m mini kum (kpibu) daa kuli vami hali ka a ti yina. A daa yi ti ka alaafee ka kuhiri yuŋ, n kɔŋdila gom. N daa na ʒin yɛn di ka di pala a tiɣimi poi ka n gba naan yi di. N tuhi a zuɣu pam ka a ʒi ʒi' shɛli a ni ʒia zuŋɔ ŋɔ. Bɔ ka a lee ni tooi niŋ n-yo ma samli m bia?

Bia: M ma n yi yiɣisina, n yɛn bola tuma n-nyɛ laɣiri yuli a ka a di dunia nyaɣisim hali ti yi.

Ma: A ba pun niŋdila lala binyɛra maa tiri ma di zuɣu n di bi lahi bɔri ni nyin niŋ lala binyɛra maa ti ma. Saha shɛli a ni yɛri maa ti yɛn paai, n yɛn lɛbila ninkurugu ka lala dunia naɣ'chintɛri shɛŋa a ni yɛri maa n ku lahi bɔri li.

Bia: N ni bɔ paɣ' so ŋun ka ŋmali ka o kuna ti duɣiri tiri a ka lahi lihiri a daalaafee zuɣu.

Ma: Mira ka a pa ti bɔ paɣa lala bini maa zuɣu, dama di pa o tuma. Pa talahi n-nyɛ li ni n tuuni kam ʒi o zuɣu balantee a ti bɔ paɣa lala bini zuɣu. A paɣa bɔbu tu ni di nyɛla a zuɣu dama a mini o n-yɛn beni hali ni yi nyɛvuli tariga ti bi yɛn ʒia guli ya.

Bia: M ma tɔ pa yɛlimi ma wula ka n yɛn niŋ tooi yo a samli?

Ma: (Nintam yirina o ninni) a puhigu ni mali m bia, puhimi ma saha kam. Manima ni na be bɛ nyɛvuli ni ka bɔri binshɛli m-bala bɛ bihi sani. N yi ti kpi, zaŋmi ma pa a bɔɣusapiŋ zuɣu n-zaŋ ma niŋ kabiri ni. N kalinsi nyaaŋa, puhimi jiŋli ka suhimi Naawuni tim' ma. Yihimi zaka a nyamma puuni tim' ma. Be viɛnyɛla ka tim jilima, dama a tuunviɛla ko n-yɛn ti che ka n nyɛ gaafara n kalinsi nyaaŋa. Tummi Naawuni ni wuhi ni a niŋ shɛli ka yum niriba a ni bɔri ni bɛ yuri a shɛm. Go'gal' shɛli ni daa gali hali ka a ti yina maa zaa taɣibu daa bi yi so sani pahila Naawuni. O daa zaŋ a mi ti ma ka a nyɛla pin'titali. Di zuɣu a tuunviɛlli kam nyɛla n yɔri ka a yɛn mali yɔri ma.

Bia: (O kɔŋ yɛltɔɣa yɛlibu ka nintam kuli zɔri o ninni).

Naawuni che ka ti zaa nyɛhi ti laamba nintam ka bɛ naan yi ŋmaligi ka che ti🙏

Ban mi laamba daŋ tooni la mi, Naawuni che ka bɛ be alizanda shɛli din gari alizandanima (Al-Jannatul Firdaus) zaa la puu. 🙏

ban mi kpalim ka bi yɛn kpalim ŋɔ mi, O yi ti yɛn ku ti ŋun che ka ti niŋ tuuba poi ka o naan yi ku ti