Salima:Doo mini o paɣa

Do' so n-daa be biɛhigu puuni ka Naawuni dahama be o zuɣu pam. Dama o daa mali hali ti paai yuun' pisopoin ayika ka o mini o paɣa na ka bia. Ban daa doli o nyaaŋa nyɛ o tuzɔbibi zaa daa ti malila bihi amaa ka Naawuni dahama maa na kuli be ŋun zuɣu. O ni daa ti paai yuun' pihiyɔbu ni awoi, Naawuni daa che ka o paɣa maa zali puli n-ti lee dɔɣi bia ka bia maa labi yaha. Lala bihi ata ka Naawuni daa ti doo ŋɔ mini o paɣa amaa ka bɛ zaa daa bi zani. Dahinshɛli ka doo ŋɔ daa ti ʒi o yiŋ sambanni ŋmɛri pɔhim, ka saan' so ti niŋ o gaafara. Doo ŋɔ daa bi garigi o ka o lahi niŋ lala hali ni buta o bi garigi o. San' ŋɔ daa ti chaŋ mi hali ni o sani n-ti puhi o ka bɔhi o, "N yaba ka wula ka a ʒiya ka n niŋ a gaafara hali ni buta ka a bi garigi ma? Bee a bi wummi?"

Doo ŋɔ daa yɛli san' ŋɔ ni o bɔri ni o wuhi Naawuni ka O baŋ ni ŋun gba suhu pa yiɣisiya, dama o mi ka Naawuni yuri ŋun bɔri saamba pam. Di zuɣu o gba yi niŋ lala Naawuni ni yuli o gba ninni lala. San' ŋɔ daa bɔhi doo ŋɔ din che ka o ti yɛli lala yɛltɔɣili maa.

Doo ŋɔ gba daa bi sɔɣi o ka yɛli o ni o zuŋɔ yuun' pihinii n-kuli bala ka Naawuni jɛlinsi be o zuɣu dama o na ka bia, hali o ni daa ti nyari dɔɣim maa gba bɛ zaa daa lahi labi bɛ ni daa yi shɛli na.

San' ŋɔ daa che ka doo ŋɔ zaŋ o chaŋ o bi' shɛba ban daa labi maa zaa gbala gbuni ka o ti nya ŋa. O daa che ka o wuhi o bi' so bɛ ni daa dɔɣi tuuli maa gballi ka o suhi Naawuni hali ka gballi maa ti tahi. Di tahibu nyaaŋa, ninsala daa yina gballi maa ni n-nyɛ kɔŋa.

San' ŋɔ daa bɔhi doo maa ni bia maa yi di be o nyɛvuli ni n-nyɛ kɔŋa o di bɔri lala bee o kpibu maa so? Doo ŋɔ daa labisi o yɛli o ni o kpibu maa so.

O daa lahi che ka o wuhi o bi' so ŋun daa pahi buyi labi maa gba gballi ka o lahi suhi Naawuni ka o gba gballi maa tahi n-yihi o na. Lala bia ŋɔ gba ni daa yina o kabiri ŋɔ ni, o daa nyɛla zom.

San' ŋɔ daa lahi bɔhi doo ŋɔ ni lala bia maa kalinsi ŋɔ mini o yi di beni dini ka o di bɔra? Doo ŋɔ daa lahi yɛli ni o gba labbu maa daa so.